من قَلبو بْيِصرُخ.. لبنان

بَدّي جَيشي وَين ما كان

يحمي شَعبي

بْسَاحِة حَربي

يْرِّد الضَرْبِه..

عَ العدوان..

بَدّي الدَّار لْأَهل الدار

ما بَدّي بَيتي.. يِنْهَار

بَدّي صْفُوف تْرِصّ صْفُوف

وْتِتسابق.. عَ خطّ النّار

وْلَمَّا حْدُود تْطَال .. حْدُود

كلّ الشَّعب يْصِير .. جْنُود

وِيهبّ تْرَابي .. بارُود!.

وْيِعلَى .. وْيِتفَجَّر ..

بركان !!.

من قلبو بيصرخ .. لبنان

بَدّي زْهُوري سْيُوف تْصِير

بَدّي حْجَاري رْصَاص تْطِير

وِرْجالي

بِشْمُوخ .. جْبَالي !

وْأَطفالي

يْصِيروا .. مْغَاوير

يْصِيروا .. حلم ال قَبل .. وْبَعد !

يْصِيروا البَرق .. يْصِيروا الرَّعد

يْطُوفوا عِزّ، وْفَخر، وْمَجد

وِيغَطّي الأرض .. الطوفان !.

من قلبو بيصرخ .. لبنان

بَدّي مهما فِيكُن صار

تْضَلُّوا الأَسياد .. الأَحرار

وْلَمَّا العار يْمِسّ حْدُودي

يِزحَف جَيْشِي وْيِمحي العار

يا جَيْشِي يْصُونَك الله

وْتِشمخ قُوه .. وْتِتعَلَّى

تَ تْحَرِّر أرضي .. كِلاَّ

وِيعود المَجد .. اللّي كان ...

من قلبو بيصرخ .. لبنان