كِيف عَمْبِتنَام؟

وَحدَك بِهَا الإيَّام؟

كِيف عَمْتِغفَى؟

مِين بِيغَفّيك

بِيغَطّيك

تَ تِدفِى؟.

نحنا بِالكْوانِين

وِ النَّاس بِردَانِين

بَدَّك تْقِلّي.. مِين؟

بَعرِف أنا الحلوين

الْ بِيرَفرفوا حْوَالَيك

وِاللّي مَعَك، وِعْلَيك

ما بَعرِفا تِخمِين؟

حلوِة؟

طَويلِه؟

شَعرها مَغزُول؟

بِتحِبّ إنت، الطُّول؟

مِين هِيِّي؟

مِين هِيِّي؟ قُول

تَ تْنَام وَحدَك هَيك...

مِش مَعقول

وْلاَ رَح بْصَدِّق.. هَيك خَبرِيّه

بَدَّك تْقِلِّي مِينها "هِيِّي"

يَلّي بْتِجي بْها اللَّيل..

لَيلِيِّه

تَاخدَك

مِن بَين إيدَيِّي

وْتِضحَك بِعِبَّا..

وْتِضحَك عْلَيِّي

وْتِغرق مَعَك..

بِفْراشَك..

الدَّافي..

وِتكُون.. غَافي!

وْإنت..

مِش غَافي!!...